ਇਸ ਵਾਰ ਦੇਸ਼ ਵਿੱਚ ਮਹਿੰਗਾਈ ਨੂੰ ਮਾਪਣ ਦਾ ਨਵਾਂ ਪੈਮਾਨਾ ਲਾਗੂ ਕੀਤਾ ਗਿਆ ਹੈ। ਨੈਸ਼ਨਲ ਸਟੈਟਿਸਟਿਕਸ ਆਫਿਸ (NSO) ਵੱਲੋਂ ਅੱਜ ਜਾਰੀ ਕੀਤੇ ਗਏ ਨਵੇਂ ਅੰਕੜਿਆਂ ਮੁਤਾਬਕ ਜਨਵਰੀ ਮਹੀਨੇ ਵਿੱਚ ਪ੍ਰਚੂਨ ਮਹਿੰਗਾਈ ਦਰ 2.75 ਫੀਸਦੀ ਦਰਜ ਕੀਤੀ ਗਈ ਹੈ। ਇਹ ਨਵੀਂ ਗਣਨਾ 2024 ਨੂੰ ਆਧਾਰ ਸਾਲ ਮੰਨ ਕੇ ਕੀਤੀ ਗਈ ਹੈ। ਇਸ ਵਾਰ ਸਰਕਾਰ ਨੇ ਮਹਿੰਗਾਈ ਨੂੰ ਮਾਪਣ ਲਈ ਵਸਤੂਆਂ ਦੀ ਗਿਣਤੀ 259 ਤੋਂ ਵਧਾ ਕੇ 308 ਕਰ ਦਿੱਤੀ ਹੈ ਅਤੇ ਸੇਵਾਵਾਂ ਨੂੰ ਵੀ 40 ਤੋਂ ਵਧਾ ਕੇ 50 ਕਰ ਦਿੱਤਾ ਹੈ ਤਾਂ ਕਿ ਦੇਸ਼ ਵਿੱਚ ਕੀਮਤਾਂ ਦੀ ਅਸਲ ਸਥਿਤੀ ਦਾ ਬਿਹਤਰ ਢੰਗ ਨਾਲ ਪਤਾ ਲੱਗ ਸਕੇ।
ਖਾਸ ਗੱਲ ਇਹ ਹੈ ਕਿ ਜਨਵਰੀ ਮਹੀਨੇ ਲਈ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੀ ਮਹਿੰਗਾਈ ਦਰ 2.13 ਫੀਸਦੀ ਰਹੀ ਹੈ। ਨਵੀਂ ਪ੍ਰਣਾਲੀ ਵਿੱਚ ਹੁਣ ਪੇਂਡੂ ਘਰਾਂ ਦੇ ਕਿਰਾਏ, ਸੀਐਨਜੀ, ਪੀਐਨਜੀ ਅਤੇ ਆਨਲਾਈਨ ਮੀਡੀਆ ਵਰਗੀਆਂ ਸੇਵਾਵਾਂ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਡਿਜੀਟਲ ਸਰੋਤਾਂ ਜਿਵੇਂ ਕਿ ਮੋਬਾਈਲ ਖਰਚੇ, ਰੇਲ ਅਤੇ ਹਵਾਈ ਸਫਰ ਦੇ ਕਿਰਾਏ ਅਤੇ ਓਟੀਟੀ (OTT) ਪਲੇਟਫਾਰਮਾਂ ਦੀ ਫੀਸ ਨੂੰ ਵੀ ਇਸ ਨਵੀਂ ਸੂਚੀ ਵਿੱਚ ਥਾਂ ਦਿੱਤੀ ਗਈ ਹੈ। ਜੇ ਪੁਰਾਣੇ ਤਰੀਕੇ (2012 ਆਧਾਰ ਸਾਲ) ਨਾਲ ਤੁਲਨਾ ਕੀਤੀ ਜਾਵੇ ਤਾਂ ਜਨਵਰੀ 2025 ਵਿੱਚ ਮਹਿੰਗਾਈ ਦਰ 4.26 ਫੀਸਦੀ ਸੀ, ਜੋ ਕਿ ਦਸੰਬਰ ਵਿੱਚ 1.33 ਫੀਸਦੀ ਦਰਜ ਕੀਤੀ ਗਈ ਸੀ।
