ਸੂਰਜਮੁਖੀ ਦਾ ਤੇਲ ਲੈ ਕੇ ਰੂਸ ਤੋਂ ਜੌਰਜੀਆ ਜਾ ਰਹੇ ਟੈਂਕਰ ’ਤੇ ਕਾਲਾ ਸਾਗਰ ਵਿੱਚ ਹਮਲਾ ਕੀਤਾ ਗਿਆ। ਤੁਰਕੀ ਦੀ ਸਮੁੰਦਰੀ ਅਥਾਰਟੀ ਨੇ ਇਹ ਜਾਣਕਾਰੀ ਦਿੱਤੀ ਹੈ।
ਅਥਾਰਟੀ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਹੀ ਰੂਸੀ ਫਲੀਟ ਵਿੱਚ ਸ਼ਾਮਲ ਦੋ ਤੇਲ ਟੈਂਕਰਾਂ ਨੂੰ ਯੂਕਰੇਨ ਦੀ ਜਲ ਸੈਨਾ ਨੇ ਡਰੋਨ ਨਾਲ ਨਿਸ਼ਾਨਾ ਬਣਾਇਆ ਸੀ। ਤੁਰਕੀ ਦੇ ਸਮੁੰਦਰੀ ਮਾਮਲਿਆਂ ਬਾਰੇ ਡਾਇਰੈਕਟੋਰੇਟ ਜਨਰਲ ਨੇ ਦੱਸਿਆ ਕਿ ਮਿਡਵੋਲਗਾ-2 ’ਤੇ ਤੁਰਕੀ ਦੇ ਤੱਟ ਤੋਂ ਲਗਪਗ 130 ਕਿਲੋਮੀਟਰ ਦੂਰ ਹਮਲਾ ਹੋਇਆ। ਚਾਲਕ ਅਮਲੇ ਦੇ 13 ਮੈਂਬਰਾਂ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ ਹੈ ਅਤੇ ਬੇੜੇ ਤੋਂ ਕਿਸੇ ਐਮਰਜੈਂਸੀ ਸਹਾਇਤਾ ਲਈ ਅਪੀਲ ਨਹੀਂ ਮਿਲੀ।
ਸਮੁੰਦਰੀ ਅਥਾਰਟੀ ਨੇ ਬਿਆਨ ’ਚ ਕਿਹਾ ਕਿ ਇਹ ਟੈਂਕਰ ਤੁਰਕੀ ਦੀ ਬੰਦਰਗਾਹ ਸਿਨੋਪ ਵੱਲ ਵਧ ਰਿਹਾ ਸੀ। ਤੁਰਕੀ ਦੇ ਰਾਸ਼ਟਰਪਤੀ ਆਰ ਟੀ ਅਰਦੋਗਾਂ ਨੇ ਸੋਮਵਾਰ ਨੂੰ ਦੋ ਰੂਸੀ ਜਹਾਜ਼ਾਂ ਕੈਰੋਸ ਅਤੇ ਵਿਰਾਟ ’ਤੇ ਯੂਕਰੇਨੀ ਡਰੋਨ ਹਮਲੇ ਦਾ ਵਿਰੋਧ ਕਰਦਿਆਂ ਇਸ ਨੂੰ ਸੰਘਰਸ਼ ਦੇ ‘ਚਿੰਤਾਜਨਕ ਪੱਧਰ ਤੱਕ ਵਧਣ’ ਦਾ ਸੰਕੇਤ ਕਰਾਰ ਦਿੱਤਾ ਸੀ।
