ਵਿਨੀਪੈਗ ਦੀਆਂ 28 ਅਕਤੂਬਰ ਨੂੰ ਹੋਈਆਂ ਸਿਟੀ ਕੌਂਸਲ ਅਤੇ ਸਕੂਲ ਬੋਰਡ ਚੋਣਾਂ ਦੇ ਨਤੀਜਿਆਂ ਵਿੱਚ ਕਈ ਅਹਿਮ ਤਬਦੀਲੀਆਂ ਦੇਖਣ ਨੂੰ ਮਿਲੀਆਂ। ਸਿਟੀ ਕੌਂਸਲ ਦੀਆਂ ਚੋਣਾਂ ਵਿੱਚ ਜਿੱਥੇ ਕਈ ਮੌਜੂਦਾ ਕੌਂਸਲਰਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਉੱਥੇ ਵੈਵਰਲੀ ਵੈਸਟ ਵਾਰਡ ਤੋਂ ਜੈਸਮੀਨ ਬਰਾੜ ਨੇ ਜਿੱਤ ਦਰਜ ਕੀਤੀ। ਦੂਜੇ ਪਾਸੇ, ਸਕੂਲ ਟਰੱਸਟੀ ਦੀਆਂ ਚੋਣਾਂ ਵਿੱਚ ਕਈ ਪੰਜਾਬੀ ਅਤੇ ਦੱਖਣੀ ਏਸ਼ਿਆਈ ਮੂਲ ਦੇ ਉਮੀਦਵਾਰਾਂ ਨੂੰ ਸਫ਼ਲਤਾ ਨਹੀਂ ਮਿਲੀ।
ਦੇਵੀ ਸ਼ਰਮਾ ਸਮੇਤ ਕਈ ਮੌਜੂਦਾ ਕੌਂਸਲਰਾਂ ਦੀ ਹਾਰ
ਓਲਡ ਕਿਲਡੋਨਨ ਵਾਰਡ ਵਿੱਚ ਲੰਮੇ ਸਮੇਂ ਤੋਂ ਸਿਆਸੀ ਤੌਰ ’ਤੇ ਸਰਗਰਮ ਦੇਵੀ ਸ਼ਰਮਾ ਨੂੰ ਗ੍ਰੇਗ ਮੈਕਫਾਰਲੇਨ ਨੇ ਹਰਾਇਆ। ਮੈਕਫਾਰਲੇਨ ਨੂੰ 6,694 ਵੋਟਾਂ ਮਿਲੀਆਂ, ਜਦਕਿ ਸ਼ਰਮਾ ਦੇ ਹੱਕ ਵਿੱਚ 4,268 ਵੋਟਾਂ ਪਈਆਂ। ਇਸੇ ਵਾਰਡ ਤੋਂ ਪੰਜਾਬੀ ਮੂਲ ਦੇ ਲਵ ਰੰਧਾਵਾ ਨੂੰ 846 ਵੋਟਾਂ ਮਿਲੀਆਂ।ਮੈਕਫਾਰਲੇਨ ਸੈਵਨ ਓਕਸ ਸਕੂਲ ਡਿਵੀਜ਼ਨ ਵਿੱਚ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੱਕ ਟਰੱਸਟੀ ਰਹਿ ਚੁੱਕੇ ਹਨ। ਦੇਵੀ ਸ਼ਰਮਾ ਪਹਿਲੀ ਵਾਰ 2010 ਵਿੱਚ ਓਲਡ ਕਿਲਡੋਨਨ ਤੋਂ ਕੌਂਸਲਰ ਚੁਣੀ ਗਈ ਸੀ। ਉਹ ਵਿਨੀਪੈਗ ਦੀ ਪਹਿਲੀ ਇੰਡੋ-ਕੈਨੇਡੀਅਨ ਕੌਂਸਲਰ ਬਣੀ ਸੀ। ਆਪਣੇ ਪਹਿਲੇ ਕਾਰਜਕਾਲ ਦੌਰਾਨ ਉਨ੍ਹਾਂ ਨੇ ਸਿਟੀ ਹਾਲ ਵਿੱਚ ਸਪੀਕਰ ਦੀ ਜ਼ਿੰਮੇਵਾਰੀ ਵੀ ਸੰਭਾਲੀ ਅਤੇ ਇਸ ਅਹੁਦੇ ’ਤੇ ਬੈਠਣ ਵਾਲੀ ਪਹਿਲੀ ਮਹਿਲਾ ਬਣੀ।
ਉੱਤਰੀ ਵਿਨੀਪੈਗ ਦਾ ਓਲਡ ਕਿਲਡੋਨਨ ਇਲਾਕਾ ਪੰਜਾਬੀ ਅਤੇ ਹੋਰ ਦੱਖਣੀ ਏਸ਼ੀਆਈ ਪਰਿਵਾਰਾਂ ਸਮੇਤ ਵੱਖ-ਵੱਖ ਪਿਛੋਕੜਾਂ ਦੇ ਲੋਕਾਂ ਦਾ ਘਰ ਹੈ। ਇੱਥੇ ਵੱਸਦੇ ਪੰਜਾਬੀ ਪਰਿਵਾਰਾਂ ਲਈ ਸਥਾਨਕ ਸਰਕਾਰ ਦੇ ਫ਼ੈਸਲੇ ਰੋਜ਼ਾਨਾ ਜੀਵਨ ਨਾਲ ਸਿੱਧੇ ਤੌਰ ’ਤੇ ਜੁੜੇ ਹੋਏ ਹਨ।
ਜੈਸਮੀਨ ਬਰਾੜ ਦੀ ਜਿੱਤ
ਵੈਵਰਲੀ ਵੈਸਟ ਵਾਰਡ ਤੋਂ ਜੈਸਮੀਨ ਬਰਾੜ ਨੇ 5,354 ਵੋਟਾਂ ਹਾਸਲ ਕਰਕੇ ਜਿੱਤ ਦਰਜ ਕੀਤੀ। ਉਨ੍ਹਾਂ ਨੂੰ 41.22 ਫ਼ੀਸਦੀ ਵੋਟਾਂ ਮਿਲੀਆਂ, ਜਦਕਿ ਉਨ੍ਹਾਂ ਦੀ ਮੁੱਖ ਵਿਰੋਧੀ ਨਫ਼ੀਆ ਨਾਸੋ ਨੂੰ 4,327 ਵੋਟਾਂ ਪ੍ਰਾਪਤ ਹੋਈਆਂ। ਬਰਾੜ ਦੀ ਜਿੱਤ ਨਾਲ ਪੰਜਾਬੀ ਭਾਈਚਾਰੇ ਦੀ ਸਥਾਨਕ ਰਾਜਨੀਤੀ ਵਿੱਚ ਨੁਮਾਇੰਦਗੀ ਦਾ ਮੁੱਦਾ ਮੁੜ ਚਰਚਾ ਵਿੱਚ ਆਇਆ ਹੈ।
ਸਕੂਲ ਟਰੱਸਟੀ ਦੀਆਂ ਚੋਣਾਂ ਵਿੱਚ ਪੰਜਾਬੀ ਮੂਲ ਦੇ ਮਨਪ੍ਰੀਤ ਤੂਰ, ਸੰਦੀਪ ਭੱਟੀ, ਪ੍ਰਭਨੂਰ ਸਿੰਘ, ਵੀਰਪਾਲ ਸੰਧੂ, ਮਨਜੋਤ ਕੰਗ ਅਤੇ ਜਗਜੀਤ ਖੱਟੜਾ ਚੋਣ ਮੈਦਾਨ ਵਿੱਚ ਸਨ। ਇਸੇ ਤਰ੍ਹਾਂ ਦੱਖਣੀ ਏਸ਼ੀਆਈ ਮੂਲ ਦੇ ਅਸੀਮ ਨਵਾਜ਼, ਨੋਮਾਨ ਜ਼ਹੀਰ ਅਤੇ ਤਸਲੀਮ ਵਲੀ ਨੇ ਵੀ ਚੋਣ ਲੜੀ। ਉਪਲਬਧ ਜਾਣਕਾਰੀ ਅਨੁਸਾਰ, ਇਨ੍ਹਾਂ ਉਮੀਦਵਾਰਾਂ ਨੂੰ ਜਿੱਤ ਹਾਸਲ ਨਹੀਂ ਹੋਈ। ਇਨ੍ਹਾਂ ਨਤੀਜਿਆਂ ਤੋਂ ਬਾਅਦ ਪੰਜਾਬੀ ਅਤੇ ਦੱਖਣੀ ਏਸ਼ਿਆਈ ਭਾਈਚਾਰੇ ਦੀ ਸਥਾਨਕ ਰਾਜਨੀਤੀ ਵਿੱਚ ਨੁਮਾਇੰਦਗੀ ਬਾਰੇ ਚਰਚਾ ਹੋਣ ਦੀ ਸੰਭਾਵਨਾ ਹੈ।
