ਲਾਹੌਰ,: ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੀ ਸਰਕਾਰ, ਮੁੱਖ ਮੰਤਰੀ ਮਰਯਮ ਨਵਾਜ਼ ਦੀ ਅਗਵਾਈ ਹੇਠ, ਨੇ ਇਕ ਨਵਾਂ ਰੋਜ਼ਾਨਾ ‘‘ਗੋਬਰ ਟੈਕਸ’’ ਲਾਗੂ ਕੀਤਾ ਹੈ। ਇਸ ਅਨੁਸਾਰ ਹਰ ਗਾਂ ਜਾਂ ਮੱਝ ਉਤੇ 30 ਪਾਕਿਸਤਾਨੀ ਰੁਪਏ ਲਾਗੂ ਹੋਣਗੇ। ਇਹ ਟੈਕਸ 168 ਨਿਰਧਾਰਤ ਪਸ਼ੂ ਕਾਲੋਨੀਆਂ ਉਤੇ ਲਾਗੂ ਕੀਤਾ ਗਿਆ ਹੈ, ਜਿਸ ਵਿਚ ਲਾਹੌਰ ਦੇ ਹਰਬੰਸਪੁਰਾ ਅਤੇ ਗੁੱਜਰਪੁਰਾ ਵਰਗੇ ਇਲਾਕੇ ਵੀ ਸ਼ਾਮਲ ਹਨ।
ਸਰਕਾਰ ਨੇ ਇਸ ਨੂੰ ‘‘ਸੁਥਰਾ ਪੰਜਾਬ’’ (ਕਲੀਨ ਪੰਜਾਬ) ਮੁਹਿੰਮ ਹੇਠ ਇਕ ਸਰਵਿਸ ਫੀਸ ਵਜੋਂ ਦਰਸਾਇਆ ਹੈ, ਦਾਅਵਾ ਕੀਤਾ ਗਿਆ ਹੈ ਕਿ ਇਕੱਠਾ ਕੀਤਾ ਗੋਬਰ ਸਾਫ਼ ਊਰਜਾ ਬਣਾਉਣ ਲਈ ਵਰਤਿਆ ਜਾਵੇਗਾ ਪਰ ਲੋਕਾਂ ਵਲੋਂ ਸੋਸ਼ਲ ਮੀਡੀਆ ਉਤੇ ਇਸ ਫ਼ੈਸਲੇ ਦੀ ਭਾਰੀ ਆਲੋਚਨਾ ਹੋ ਰਹੀ ਹੈ। ਲੋਕਾਂ ਨੇ ਮਜ਼ਾਕ ਬਣਾਇਆ ਕਿ ਸਰਕਾਰ ਜਲਦੀ ਹੀ ਮਨੁੱਖੀ ਮਲ ਉਤੇ ਵੀ ਟੈਕਸ ਲਗਾ ਦੇਵੇਗੀ ਜਾਂ ਇਹ ਟੈਕਸ ਸਿਆਸੀ ਨੇਤਾਵਾਂ ਦੇ ‘‘ਗੋਬਰ-ਭਰੇ ਦਿਮਾਗਾਂ’’ ਉਤੇ ਲਗਾਇਆ ਜਾਣਾ ਚਾਹੀਦਾ ਹੈ।
ਅਦਾਕਾਰਾ ਅਤੇ ਕਾਮੇਡੀਅਨ ਮਿਸ਼ੀ ਖ਼ਾਨ ਨੇ ਵੀ ਇਸ ਫ਼ੈਸਲੇ ਨੂੰ ਮਜ਼ਾਕ ਕਰਾਰ ਦਿਤਾ, ਕਹਿੰਦੇ ਕਿ ਆਮ ਪਾਕਿਸਤਾਨੀ ਪਹਿਲਾਂ ਹੀ ਆਰਥਕ ਦਬਾਅ ਹੇਠ ਹਨ। ਸੋਸ਼ਲ ਮੀਡੀਆ ਉਤੇ ਤਨਜ਼ੀ ਸੁਝਾਅ ਵੀ ਆਏ। ਹਾਲਾਂਕਿ ਮਜ਼ਾਕਾਂ ਦੇ ਨਾਲ-ਨਾਲ ਗੰਭੀਰ ਚਿੰਤਾ ਦਾ ਵਿਸ਼ਾ ਵੀ ਹੈ ਕਿ ਇਹ ਫੀਸ ਛੋਟੇ ਡੇਅਰੀ ਕਿਸਾਨਾਂ ਅਤੇ ਪਸ਼ੂ ਪਾਲਕਾਂ ਉਤੇ ਵਾਧੂ ਬੋਝ ਪਾ ਸਕਦੀ ਹੈ। ਵਿਰੋਧੀ ਧਿਰਾਂ ਨੇ ਇਸਨੂੰ ਵਾਤਾਵਰਣੀ ਮੁਹਿੰਮ ਦੇ ਨਾਮ ਉਤੇ ਲਗਾਨ ਇਕੱਠਾ ਕਰਨ ਦੀ ਕੋਸ਼ਿਸ਼ ਕਰਾਰ ਦਿਤਾ ਹੈ।(ਏਜੰਸੀ)
