ਹੈਦਰਾਬਾਦ ਤੋਂ ਹੁਬਲੀ ਜਾ ਰਹੀ Fly-91 ਏਅਰਲਾਈਨ ਦੀ ਇੱਕ ਫਲਾਈਟ (IC3401) ਨੂੰ ਖਰਾਬ ਮੌਸਮ ਕਾਰਨ ਬੰਗਲੁਰੂ ਡਾਇਵਰਟ ਕਰਨਾ ਪਿਆ। ਇਹ ਘਟਨਾ ਐਤਵਾਰ ਦੀ ਹੈ ਅਤੇ ਇਸ ਬਾਰੇ ਜਾਣਕਾਰੀ ਸੋਮਵਾਰ ਨੂੰ ਸਾਹਮਣੇ ਆਈ। ਫਲਾਈਟ ਦੁਪਹਿਰ 3 ਵਜੇ ਹੈਦਰਾਬਾਦ ਤੋਂ ਰਵਾਨਾ ਹੋਈ ਸੀ ਅਤੇ ਇਸ ਨੂੰ ਸ਼ਾਮ ਕਰੀਬ 4:30 ਵਜੇ ਹੁਬਲੀ ਪਹੁੰਚਣਾ ਸੀ, ਪਰ ਖਰਾਬ ਮੌਸਮ ਕਾਰਨ ਇਹ 2 ਘੰਟੇ ਹਵਾ ਵਿੱਚ ਰਹੀ ਅਤੇ ਲੈਂਡ ਨਹੀਂ ਹੋ ਸਕੀ। ਇਹ ਜਹਾਜ਼ ਲਗਪਗ ਇੱਕ ਘੰਟੇ ਤੱਕ ਹੁਬਲੀ ਦੇ ਆਲੇ-ਦੁਆਲੇ ਚੱਕਰ ਲਗਾਉਂਦਾ ਰਿਹਾ ਅਤੇ ਫਿਰ ਇੱਕ ਘੰਟੇ ਬਾਅਦ ਸ਼ਾਮ 6:30 ਵਜੇ ਬੰਗਲੁਰੂ ਏਅਰਪੋਰਟ ‘ਤੇ ਉਤਾਰਿਆ ਗਿਆ। ਇਸ ਫਲਾਈਟ ਨੂੰ ਬੰਗਲੁਰੂ ਤੋਂ ਰਾਤ 11 ਵਜੇ ਦੁਬਾਰਾ ਹੁਬਲੀ ਲਈ ਰਵਾਨਾ ਕੀਤਾ ਗਿਆ। ਇਸ ਜਹਾਜ਼ ਵਿੱਚ ਕੁੱਲ 22 ਯਾਤਰੀ ਸਵਾਰ ਸਨ।
ਇਸ ਦੌਰਾਨ ਫਲਾਈਟ ਵਿੱਚ ਸਵਾਰ ਯਾਤਰੀ ਬਹੁਤ ਜ਼ਿਆਦਾ ਘਬਰਾਏ ਹੋਏ ਨਜ਼ਰ ਆਏ। ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈਆਂ ਵੀਡੀਓਜ਼ ਵਿੱਚ ਯਾਤਰੀ ਰੋਂਦੇ ਹੋਏ ਅਤੇ ਹੱਥ ਜੋੜ ਕੇ ਪ੍ਰਾਰਥਨਾ ਕਰਦੇ ਦਿਖਾਈ ਦੇ ਰਹੇ ਹਨ। ਵੀਡੀਓ ਵਿੱਚ ਯਾਤਰੀ ਆਪਣੀਆਂ ਸੀਟਾਂ ‘ਤੇ ਬੈਠੇ ਬਹੁਤ ਡਰੇ ਹੋਏ ਹਨ ਅਤੇ ਕਈ ਲੋਕ ਚੀਕਾਂ ਮਾਰ ਰਹੇ ਹਨ। ਵੀਡੀਓ ਵਿੱਚ ‘ਓਹ ਮਾਈ ਗੌਡ’ ਵਰਗੀਆਂ ਆਵਾਜ਼ਾਂ ਸੁਣਾਈ ਦੇ ਰਹੀਆਂ ਹਨ। ਇੱਕ ਯਾਤਰੀ ਇਹ ਕਹਿੰਦਾ ਸੁਣਿਆ ਜਾ ਰਿਹਾ ਹੈ ਕਿ ਪਾਇਲਟ ਨੂੰ ਕਹੋ ਕਿ ਬੰਗਲੁਰੂ ਲੈ ਚੱਲੇ ਜਾਂ ਫਿਰ ਬੇਲਗਾਮ ਹੀ ਲੈ ਜਾਵੇ। ਇਸ ਦੇ ਨਾਲ ਹੀ ਦੂਜੇ ਲੋਕ ਇੱਕ-ਦੂਜੇ ਨੂੰ ਹੌਸਲਾ ਦਿੰਦੇ ਹੋਏ ਕਹਿ ਰਹੇ ਹਨ ਕਿ “ਰੋਵੋ ਨਾ, ਕੁਝ ਨਹੀਂ ਹੋਵੇਗਾ।” ਪਾਇਲਟ ਨੇ ਵੀ ਯਾਤਰੀਆਂ ਨੂੰ ਕਿਹਾ ਕਿ ਅਸੀਂ ਹੋਲਡ ‘ਤੇ ਹਾਂ, ਕਿਰਪਾ ਕਰਕੇ ਸਬਰ ਰੱਖੋ ਅਤੇ ਨਿਰਦੇਸ਼ਾਂ ਦੀ ਪਾਲਣਾ ਕਰੋ।
ਏਅਰਲਾਈਨ ਨੇ ਕਿਹਾ- ਕੋਈ ਤਕਨੀਕੀ ਖਰਾਬੀ ਨਹੀਂ ਸੀ
Fly-91 ਏਅਰਲਾਈਨ ਨੇ ਸਪੱਸ਼ਟ ਕੀਤਾ ਹੈ ਕਿ ਫਲਾਈਟ ਵਿੱਚ ਕੋਈ ਵੀ ਤਕਨੀਕੀ ਖਰਾਬੀ ਨਹੀਂ ਸੀ। ਜਹਾਜ਼ ਨੂੰ ਦੂਜੇ ਪਾਸੇ ਮੋੜਨਾ (ਡਾਇਵਰਸ਼ਨ) ਸਿਰਫ ਖਰਾਬ ਮੌਸਮ ਕਾਰਨ ਕੀਤਾ ਗਿਆ ਸੀ। ਏਅਰਲਾਈਨ ਮੁਤਾਬਕ ਹੁਬਲੀ ਦੇ ਉੱਪਰ ਜਹਾਜ਼ ਨੂੰ ਹੋਲਡ ‘ਤੇ ਰੱਖਣਾ ਅਤੇ ਬਾਅਦ ਵਿੱਚ ਬੰਗਲੁਰੂ ਭੇਜਣਾ ਇੱਕ ਤੈਅ ਸੁਰੱਖਿਆ ਪ੍ਰਕਿਰਿਆ ਦਾ ਹਿੱਸਾ ਹੈ। ਕੰਪਨੀ ਨੇ ਕਿਹਾ ਕਿ ਤਕਨੀਕੀ ਖਰਾਬੀ ਦੀਆਂ ਖ਼ਬਰਾਂ ਗਲਤ ਅਤੇ ਬੇਬੁਨਿਆਦ ਹਨ ਅਤੇ ਸੁਰੱਖਿਆ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਖਰਾਬ ਮੌਸਮ ਕਾਰਨ ਮੁੰਬਈ ਤੋਂ ਕੋਲਹਾਪੁਰ ਜਾਣ ਵਾਲੀ ਇੱਕ ਹੋਰ ਫਲਾਈਟ ਨੂੰ ਵੀ ਗੋਆ ਡਾਇਵਰਟ ਕਰਨਾ ਪਿਆ ਸੀ।
