US-China Trade War : ਅਮਰੀਕਾ ਤੇ ਚੀਨ ਵਿਚਕਾਰ ਚੱਲ ਰਹੇ ਵਪਾਰਕ ਤਣਾਅ ਦੌਰਾਨ ਚੀਨ ਨੇ ਸਖ਼ਤ ਲਹਿਜਾ ਅਪਣਾਇਆ ਹੈ। ਚੀਨ ਦੇ ਪ੍ਰਧਾਨ ਮੰਤਰੀ ਲੀ ਕਿਆਂਗ (Li Qiang) ਨੇ ਸੋਮਵਾਰ ਨੂੰ ਅਮਰੀਕਾ ਦੀ ਟੈਰਿਫ ਨੀਤੀ ‘ਤੇ ਸਿੱਧਾ ਹਮਲਾ ਕਰਦਿਆਂ ਕਿਹਾ ਕਿ ਦੁਨੀਆ ਨੂੰ ‘ਜੰਗਲ ਦੇ ਕਾਨੂੰਨ’ ਯਾਨੀ ਲਾਅ ਆਫ ਦ ਜੰਗਲ ਵੱਲ ਵਾਪਸ ਨਹੀਂ ਜਾਣਾ ਚਾਹੀਦਾ, ਜਿੱਥੇ ਤਾਕਤਵਰ ਦੇਸ਼ ਕਮਜ਼ੋਰਾਂ ਨੂੰ ਦਬਾਉਂਦੇ ਹਨ।
ਲੀ ਕਿਆਂਗ ਨੇ ਇਹ ਬਿਆਨ ਮਲੇਸ਼ੀਆ ਦੀ ਰਾਜਧਾਨੀ ਕੁਆਲਾਲੰਪੁਰ ‘ਚ ਚੱਲ ਰਹੇ ਆਸੀਆਨ (ASEAN) ਸੰਮੇਲਨ ‘ਚ ਦਿੱਤਾ। ਉਨ੍ਹਾਂ ਅਮਰੀਕਾ ਦੀ ਇਕਪਾਸੜ (Unilateral) ਨੀਤੀਆਂ ਬਾਰੇ ਕਿਹਾ, “ਆਰਥਿਕ ਗਲੋਬਲਾਈਜ਼ੇਸ਼ਨ ਤੇ ਬਹੁ-ਧਰੂਵੀਕਰਨ ਹੁਣ ਅਟਲ ਹੈ। ਦੁਨੀਆ ਨੂੰ ਇਸ ਸਮੇਂ ਮਿਲ ਕੇ ‘ਮੁਕਤ ਵਪਾਰ ਪ੍ਰਣਾਲੀ’ ਨੂੰ ਮਜ਼ਬੂਤ ਕਰਨਾ ਚਾਹੀਦਾ ਹੈ।”
ਟਰੰਪ ਨੇ ਚਿਤਾਵਨੀ ਦਿੰਦਿਆਂ ਕੀ ਕਿਹਾ ਸੀ ?
ਉਨ੍ਹਾਂ ਦਾ ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ, ਜਦੋਂ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਚਿਤਾਵਨੀ ਦਿੱਤੀ ਸੀ ਕਿ ਜੇਕਰ 1 ਨਵੰਬਰ ਤਕ ਕੋਈ ਸਮਝੌਤਾ ਨਹੀਂ ਹੁੰਦਾ ਤਾਂ ਉਹ ਚੀਨ ਦੇ ਦਰਾਮਦ ‘ਤੇ 100% ਟੈਰਿਫ ਲਗਾਉਣ ਦੀ ਨੀਤੀ ‘ਤੇ ਅੱਗੇ ਵਧਣਗੇ। ਹਾਲਾਂਕਿ, ਦੋਹਾਂ ਦੇਸ਼ਾਂ ਵਿਚਕਾਰ ਹਾਲ ਹੀ ‘ਚ ਸਕਾਰਾਤਮਕ ਸੰਕੇਤ ਮਿਲੇ ਹਨ। ਅਮਰੀਕੀ ਟ੍ਰੈਜ਼ਰੀ ਸੈਕਟਰੀ ਸਕਾਟ ਬੇਸੈਂਟ ਨੇ ਦੱਸਿਆ ਕਿ ਵਾਸ਼ਿੰਗਟਨ ਤੇ ਬੀਜਿੰਗ ਵਿਚਕਾਰ ਇਕ ‘ਬੇਸਿਕ ਕੰਸੈਂਸਿਜ਼’ (ਮੂਲ ਸਹਿਮਤੀ) ਬਣ ਗਈ ਹੈ ਤੇ 100% ਟੈਰਿਫ ਦੀ ਸੰਭਾਵਨਾ ਹੁਣ ‘ਲਗਪਗ ਖਤਮ’ ਹੋ ਚੁਕੀ ਹੈ। ਉਨ੍ਹਾਂ ਕਿਹਾ, “ਸਾਡੇ ਕੋਲ ਹੁਣ ਨੇਤਾਵਾਂ ਦੇ ਵਿਚਕਾਰ ਗੱਲਬਾਤ ਲਈ ਇਕ ਸਫਲ ਢਾਂਚਾ ਤਿਆਰ ਹੈ।”
ਦੱਖਣੀ ਕੋਰੀਆ ‘ਚ ਮਿਲਣਗੇ ਟਰੰਪ-ਜਿਨਪਿੰਗ
ਟਰੰਪ ਤੇ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਇਸ ਹਫ਼ਤੇ ਦੱਖਣੀ ਕੋਰੀਆ ‘ਚ ਮਿਲਣ ਵਾਲੇ ਹਨ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਸ ਮੀਟਿੰਗ ‘ਚ ਵਪਾਰਕ ਸਮਝੌਤੇ ‘ਤੇ ਮੋਹਰ ਲੱਗ ਸਕਦੀ ਹੈ, ਜਿਸ ਨਾਲ ਦੋਹਾਂ ਦੇਸ਼ਾਂ ਦੇ ਵਿਚਕਾਰ ਲੰਬੇ ਸਮੇਂ ਤੋਂ ਚੱਲ ਰਹੇ ਟਕਰਾਅ ‘ਚ ਨਰਮੀ ਆ ਸਕੇਗੀ। ਟਰੰਪ ਨੇ ਰਵਾਨਾ ਹੋਣ ਤੋਂ ਪਹਿਲਾਂ ਕਿਹਾ, “ਅਸੀਂ ਦੱਖਣੀ ਕੋਰੀਆ ‘ਚ ਰਾਸ਼ਟਰਪਤੀ ਸ਼ੀ ਨੂੰ ਮਿਲਣ ਜਾ ਰਹੇ ਹਾਂ। ਮੈਨੂੰ ਭਰੋਸਾ ਹੈ ਕਿ ਇਸ ਵਾਰ ਚੀਨ ਨਾਲ ਚੰਗਾ ਸਮਝੌਤਾ ਹੋਵੇਗਾ।”
ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਇਹ ਮੀਟਿੰਗ ਸਫਲ ਰਹੀ ਤਾਂ ਇਹ ਵਿਸ਼ਵ ਬਾਜ਼ਾਰਾਂ ਲਈ ਇਕ ਵੱਡੀ ਰਾਹਤ ਸਾਬਤ ਹੋ ਸਕਦੀ ਹੈ।
